三信徒三角度看同志平權

■三信徒三角度看同志平權【2012/11/27 香港蘋果日報】

【性傾向歧視—蘋民諮詢】

【本報訊】由反歧視法到家暴條例，每場戰役，同志團體都會遇上天敵─以基督宗教為首的信仰團體。為何反歧視會影響到宗教人士的言論自由？為甚麼對同性有生理反應不是罪，發展出性行為卻需要懺悔？如果最大的誡命是愛人如己，如果最大的仇敵都能愛，有不同性傾向的人為甚麼要被教會拒諸門外？

教會，是基督的肢體，卻同時滿身罪污；這麼近那麼遠，從事性別研究的信徒、明光社董事、天主教神父，明明白白點出那條不可逾越的界線是甚麼。

記者：王家文　張嘉雯

■明光社關啟文：憂團體要求同志婚姻

被同志團體視為「頭號敵人」的明光社，短短九日間取得近三萬個簽名，力阻性傾向歧視條例立法諮詢，該社董事關啟文認為，現時同性戀者的處境已大為改善，基本人權沒受損，擔心一旦立法會影響言論自由，宗教團體憑良心發言動輒得咎。他同時憂慮打開反歧視立法閘口後，同志團體會進一步要求同志婚姻。

怕立法會帶來寒蟬效應

本身是浸會大學宗教及哲學系系主任的關啟文認為，自1991年肛交非刑事化後，社會風氣漸改，同性戀者的處境已大為改善，「明哥（黃耀明）出櫃，有冇人攻擊佢吖？家唔係唔畀佢申請公屋，唔係唔畀佢攞綜援，如果你話同性戀者比較窮，要畀啲subsidy（津貼）佢，我係支持㗎喎，但呢樣嘢唔同立法，因為立法係規管自由」。

他認為一旦立法等於宣佈同性戀無問題，「應該等公民社會辯論，可能最終個社會會變，慢慢走向liberal（自由開放），我哋呢啲保守嘅人慢慢被淘汰都唔定，但係你家用咁嘅方法唔畀我講嘢，我個心就係唔服」。

他認為法律條文難以寫得完全清晰，會扼殺反同性戀嘅聲音，「好似『侮辱』、『嘲諷』呢啲字眼，點樣可以寫得清楚啲？原來騷擾、冒犯、不受歡迎嘅言論，同埋批評都唔可以㗎喎。」他擔心條例會帶來寒蟬效應，「好似23條咁，見到把刀你仲敢唔敢郁吖？平機會會幫啲人申請打官司嘅錢，唔使付代價，僱主就算贏官司，都要付堂費，有冇人想受咁嘅折磨先？」

「一成啱都唔應該被禁」

他表示，若法例「斬件」討論，他或會考慮，但現時社會討論已走向極端，「話我哋講同性戀等於肛交人鬧我哋，我哋從來冇話兩樣嘢係等同，家有理說不清，係對唔贊成同性戀嘅人高度不平等……話我哋係道德塔利班，塔利班殺人㗎喎」。

「我哋講緊嘅家庭價值，可能有九成係rubbish（垃圾），就算得一成啱，都唔應該被禁，你要講Voltaire（伏爾泰），至死維護對方嘅發言權利，但我見唔到有人維護明光社嘅權利喎。」他認為一旦反歧視法通過，同志運動下一步就是爭取公民結合、同志婚姻，「佢攞咗第一步，就會有第二步，好似反國教咁，啲團體都係第一步都唔讓，一定要政府撤回，因為擔心政府會利誘學校做」。

蘋民洗版︰

music-shop︰好似哥哥（張國榮）同明哥（黃耀明），好多年前都知的公開秘密（是同性戀者），我都不知幾support（支持）佢哋表演。同志又點，咪又係一個人。

Silvia Chow︰有勇氣說出真相，好！支持人人平等看待。尊重個別身心發展，只要健康同快樂已很足夠。

塘邊學︰不關心人權，何來會平權？香港人對人權的關心不足，連對70歲長者亦如是。

Gary Au Yeung︰搞基既然咁普通、咁平常，點解要立法保護呢？？

Man Hay Leung︰立即停止歧視

節錄自蘋果日報facebook留言

■性別研究學者梁偉怡：逆向歧視冊子講大話

●梁偉怡批評逆向歧視小冊子中的案例不盡不實，決心向公眾揭露真相。馬泉崇攝

本身是基督徒的梁偉怡，在中大任性別研究課程講師，數年前看到維護家庭聯盟出版的逆向歧視小冊子，好奇追查法庭判詞，結果發現所謂因反同言論而惹官司的個案全部都不盡不實，「嗰時覺得好嬲，點解佢哋要擘大眼講大話？佢哋捩橫折曲、加鹽加醋，就係想人驚咗呢條（反歧視）條例」。於是他把個案結集，決心向公眾揭露實況。

梁偉怡得悉真相時非常震驚，「《聖經》唔係話『是，就說是；不是，就說不是；若再多說，就是出於那惡者』㗎咩？點解佢哋唔本住事實去講？」

引惠普案例不盡不實

他舉2004年美國惠普公司案為例，小冊子指「有一員工因張貼《聖經》反對同性戀的經文而遭到解僱，理由是他煽動不寬容的工作氣氛」。梁偉怡發現，該公司當時正推行多元和諧工作間的活動，並印製了一系列海報，包括黑人、老人、西班牙人、同性戀者等，以示接納不同背景的員工；其中一名員工Richard Peterson在印有同性戀者字眼的海報上，貼上《聖經》〈利未記〉的經文「如果有人與男人同睡，像與女人同睡一樣，他們二人行了可憎的事，必要把他們處死，他們必須承擔流血的罪責」。

「貼句咁嘅嘢喺度，又冇解釋係乜，係好暴力㗎喎，公司多次勸喻佢（張貼經文者），佢死都唔肯攞番落嚟，先解僱佢。家係咪宗教可以橫行無忌呢？點解本書講一半唔講一半，唔講佢貼咗乜經文，又唔講佢塗污咗公物呢？」

他對立法會議員涂謹申尤為不滿，「佢作為一個立法會議員，又係律師，可以完全唔查證，唔喺發言同投票前重新深入搵番相關嘅資料，公然講呢啲錯誤嘅例子，係非常之不負責任」。

法律學者撐反歧視法

曾任平機會培訓顧問的樹仁大學法律與商業學系系主任趙文宗，同樣不認為反歧視法會帶來逆向歧視，「言論自由唔係全無限制，唔係absolute（絕對），唔係可以傷害人嘅尊嚴㗎嘛，好多嘢我哋以前覺得無問題，好似講sex jokes（黃色笑話）、喺公司貼大大張性感女性poster（海報），家都會覺得有問題啦，法律其中一個目的正正係教育人」。

他不認為反歧視法嚴苛，「法例可以modify（修改），所有法例都有機會被濫用㗎啦，你要唔信法庭、唔信法官，咁我幫唔到你㗎喎，係咪因為一兩單官司就質疑成個司法制度先？」

■陳滿鴻神父：支持直接立法免諮詢

●陳滿鴻神父不擔心性傾向歧視立法限制言論自由，但主張建立關愛文化應優先於立法。

有同志團體在2003年因《公教報》一篇報道衝擊天主教堂，時任教區主教的陳日君被質疑沒良心；來到今次反歧視立法戰役，天主教會一直沉默不語。天主教正義和平委員會教會顧問陳滿鴻神父開腔，表明教會原則上不反對立法，亦不擔心條例會影響言論自由，「一個人唔應該因為性傾向不同而被歧視，如果立法真係可以有效消除歧視，教會唔會反對，教會只係反對同性婚姻」。

陳滿鴻甚至嫌立法會議員何秀蘭的議案太迂迴，「點解要諮詢呢？點解唔直接話立法呢？事實上立法會入面嘅教友都支持個議案」。但他認為，立法應有優次，同志未必是最有需要的一群，「除非個類別好大，例如成個性別嘅人被歧視呀咁，如果唔係所有嘢都立法，立極都立唔完，永無寧日，我哋需要嘅係一個可以涵蓋更多唔同社群嘅歧視法，一個條文包含所有嘢，但更加重要嘅係建立關愛文化」。

教會反對同性性行為

對於有教會引用外國例子，指新例會引來逆向歧視，陳滿鴻不認同，「一個正常人、有修養嘅人都唔會隨便鬧人啦，一個基督徒本身就唔應該用刻薄嘅字眼鬧人……話立法會影響到言論自由，扯得太遠喇，咁樣講係對爭取嘅同性戀團體唔公道」。

若教會放棄反歧視法這橋頭堡，會否連同性婚姻的防線也被冲毀？陳滿鴻則認為「一件事還一件事」，「根據外國經驗，同運爭取到反歧視，下一步就係同性婚姻，但家咁樣推論係過份咗，因為歧視本身係唔啱，佢之後再爭取啲乜係另一回事」。

但陳滿鴻明言，教會反對同性性行為，「一個人對同性有生理反應、有愛人嘅感覺，呢樣嘢冇啱同錯，教會唔覺得呢種感覺係唔正當，不過對同性嘅感情發展成情慾，就唔贊成」。他解釋，教會不會要求同性戀者改變性傾向，亦不會提供改變性傾向的「服務」。

陳滿鴻認為，教會體制沒有歧視同性戀者，同性性行為和其他教會「罪行」一視同仁，「就好似異性戀者對伴侶不忠，或者離咗婚嘅人再婚一樣，要先辦修和聖事（又稱告解），先可以領聖體」。

陳滿鴻坦白說，天主教會規例嚴謹，但執法寬鬆，「異性戀者真係守貞潔都好少啦，包二奶呀乜都有，咪仍然返教會！對於異性戀者出軌，我哋係好容忍，佢做唔到係一件事，但教會起碼都要有個規範」。

■結婚生育　自騙半生 女同志基督徒終走出衣櫃

●同志基督徒Annie對女兒於心有愧，最渴望有天能向女兒坦承自己的性向。何家達攝

【本報訊】她一直以為，同性戀是罪。明明喜歡女孩，卻要嫁給男人。相信婚姻可改變性取向，結果婚後出軌，再愛上女人。痛苦半生，她選擇跟丈夫離婚，向家人吐出真相，再辭去教會工作，因為信仰告訴她，要坦誠面對自己本相，要「行在光明中」。解開了宗教枷鎖，還有子女這關口未過。她期望有一天能親口告訴女兒：「媽媽是同性戀者。」

從沒放棄當神職人員

如果可再選擇，Annie（化名）不會結婚，「前半生學做一個女人，唔係真正嘅自己」。結婚近廿載，離婚收場，對女兒最是愧疚，「唔能夠陪伴佢成長」。數年前分居，前夫跟女兒解釋，「媽咪為實現理想，唔能夠同我哋一齊住」。臨走當日，她送女兒上託兒所，一眼也不敢回望，「一路喊唔停」。豁了出去，她甘願承受，「往後日子我只想為自己而活」。

Annie今年40餘歲，在基督徒家庭長大，未滿月已受洗，父親還給她改了一個中文聖名，希望她將來成為神職人員，但她小學已喜歡女孩，「見到女仔就想追」，自幼卻被灌輸同性戀是罪，「返到屋企就懺悔」。中學念女校，開始拍拖，「冇一個係男仔」。當時她自覺污穢不堪，惟無法自拔，「身心靈被撕裂」。

信仰一直跟性向角力，在外國留學和工作，Annie有位拍拖多年的女友，對方突然結婚，她氣憤，但更累，「想行番條好路」。重投男人懷抱，「信仰上係一個正確決定」。她跟同是教友的男友結婚，婚後一年出軌，再愛上女人。婚外情維持了幾年，世俗不容，信仰喝止，這次她主動離開，回港讀神學，「要洗心革面」，更誕下女兒，「覺得咁先係完整」。

她曾以為，同志身份是一道痊癒了的傷疤，「唔會再痕再癢」，但原來是一顆種子，「遇上合適氣候就會再萌芽」。回港念神學，她說像戒毒，「唔再掂毒品」，卻發現原來同志無罪，「已經為自己鬆綁」。數年前遇上現任女友，她不再自欺欺人，在丈夫和家人面前出櫃，妹妹不再親近，姊姊患上抑鬱。

Annie在教會工作，位高權重，訪問也是在教堂進行。Annie說，從沒放棄成為神職人員。但這裏容不下一位同性戀者，「（教會）離婚都唔接受，何況係同志？」她毅然辭職，但對女兒卻於心有愧，後悔把她生下來，「佢唔使有一個同志母親」。女兒一直憧憬，母親是長髮穿長裙，現實卻是相反，「我話畀佢聽，媽咪係中性」。待女兒年紀漸長，就會向她說出真相，「如果唔接受，我會尊重佢選擇」。

盼獲女兒無條件接納

母親是同志，對女兒公平嗎？「我都想問番上帝，點解我係同志？」Annie說，出櫃至今，生命像被吞噬，拋夫棄女，受萬般指摘，她坦承做錯，「唔應該進入異性婚姻」。苦苦掙扎半生，她慶幸終能跳出傳統信仰枷鎖，「我係有得揀，只要為後果負責」。前半生都戴上面具，她說：「今後要忠誠面對自己」；最希望有一天，能聽到女兒說句：「媽咪無論你係點，我都好愛你！」